O Ministerio de Educación e o Concello de Xermade ofrecen, a través dos cursos da aula Mentor, formación a distancia aos adultos da localidade, co obxectivo de “promover a igualdade de acceso á formación e contribuír a reducir a fenda dixital”.
A subdelegada do Goberno en Lugo, Isabel Rodríguez, destacou que se trata “dunha gran oportunidade para as persoas que viven no medio rural, dado que lles permite acceder a unha formación de calidade, axustada á demanda laboral“.
Así mesmo, Rodríguez explicou que a aula Mentor está dirixida a maiores de 18 anos e conta cun catálogo de máis de 170 cursos clasificados por áreas formativas. O Concello de Xermade obtivo unha axuda de 4.000 euros para este propósito e a colaboración entre as dúas entidades asinouse o 2021.
Estes cursos teñen validez oficial e, unha vez superados, obtense un certificado emitido polo Ministerio de Educación e Formación Profesional. Así, o seu custo é de 24 euros mensuais e a duración depende do tempo que lle dedique cada estudante.
