O Concello de Castro de Rei (Lugo) emitiu un bando municipal por mor da seca para evitar usos “indebidos” da auga, tales como baldeos, regas e lavados de vehículos.
“O que estamos a observar é que ben sexa nas captacións procedentes de mananciais, ou ben sexa nos ríos que abastecen os depósitos municipais está a baixar o nivel das augas e esta é unha medida preventiva”, explicou o alcalde, Francisco Balado.
O rexedor incidiu en que “o que se persegue é reducir o consumo de auga coa finalidade de evitar as restricións máis gravosas, como sería fornecer auga só unhas horas ao día”. “Queremos que se faga un uso o máis racional posible, para evitar o desabastecemento do concello”, puntualizou o alcalde de Castro de Rei.
En canto ao uso de camións cisterna, Balado constatou que “soamente temos algún caso puntual, en que teñen abastecemento propio e leva un camión de auga”. “Falamos dun ou dous casos en todo o concello, que ten pouco máis de 5.000 habitantes e isto (levar auga) é moi excepcional”, subliñou.
Balado confesou que a súa “preocupación” non “é só pola situación actual” do municipio, senón “o que poida suceder, porque a seca cando máis afecta é no mes de setembro” e pódeno “pasar mal”.
“É unha medida na que pedimos aos veciños que reduzan o consumo e céntrese o uso da auga da traída nos usos prioritarios da auga”, concluíu o rexedor de Castro.
