A 21 edición do Arde Lucus, a festa de recreación do pasado romano e castrexo da cidade de Lugo, pechouse con cifras “marca” en canto á participación e o impacto económico para a cidade de Lugo. Así o coincidiron en sinalar a alcaldesa, Lara Méndez; o presidente da Asociación Provincial de Empresarios de Hostalaría de Lugo, Cheché Real, e o presidente de Lugo Monumental, Luís Latorre.
Lara Méndez cualificou esta edición de “éxito rotundo, cunha participación intensa de toda a cidadanía”. “Sobre todo da xente que nos visitou de España, doutros países de diferente procedencia, de Sudamérica, de Norteamérica ou de Europa“, destacou.
A rexedora lucense celebrou que se trata dun “punto de inflexión para conseguir a declaración de Festa de Interese Internacional“. “Tamén teño que destacar o comportamento da cidadanía, foi unha festa con moita alegría, con moita participación e un comportamento exemplar”, apuntou.
Ademais, cualificou con “outro dez” a “inxección económica que representa para a cidade, sobre todo para a hostalaría e o comercio”. “Ademais quero recoñecer o gran traballo das 19 asociacións de recreación histórica e non quero esquecerme do que foi o desfile dos colexios, que demostra a longa vida do Arde Lucus”, enxalzou.
Pola súa banda, o presidente dos hostaleiros galegos e de Lugo, Cheché Real, tamén fixo un balance “altamente positivo, coa consolidación absoluta postcovid do Arde Lucus”. “A presenza na rúa foi masiva e apoteósica”, sinalou.
En canto a ocupación hoteleira, sitúaa “entre o 95 e o cento por cento, en función de si o aloxamento era no centro ou estaba máis afastado, mesmo nalgún concello limítrofe”. Desde a asociación Lugo Monumental, o seu presidente, Luís Latorre, coincide en que foi “unha edición inmellorable”. “Notábase que a xente tiña ganas de volver á normalidade”, dixo.
“Queremos felicitar ás asociacións do Arde Lucus que traballaron como nunca, á hostalaría que tamén traballou como nunca”, sinalou. “Foi un éxito rotundo. Foi un traballo en equipo fantástico e as 19 asociacións dérono todo, a hostalaría deuno e todo o mundo traballou en equipo para que saíse adiante”, concluíu.
