A Deputación de Lugo e o Concello de Meira asinaron este xoves un convenio de colaboración, cun investimento de 850.000 euros en tres anualidades, para a posta en marcha dun Centro de Atención a Maiores nesta localidade, que esperan poder abrir “para o verán”.

Segundo informou a Deputación lucense, este centro contará con 30 prazas de residencia, ampliables a 38 se fose preciso, e outras 20 de centro de día. Nos próximos días abrirase o prazo de solicitude de prazas para que opten a elas as persoas interesadas.

Ademais, a institución provincial licitou o equipamento para estas instalacións por case 300.000 euros. “Seguimos dando pasos importantes para cumprir cos compromisos e demostramos con feitos que o modelo de xestión pública é o sistema que funciona”, destacou o presidente da entidade, José Tomei Roca.