As deputadas do PPdeG no Parlamento Galego simbolizaron hoxe o seu apoio a Elena Candia tras o comentario machista do presidente da Deputación, José Tomé, en alusión á vestimenta da líder dos populares lucenses. As compañeiras de Candia vestíronse con estampados de ‘animal print’ e criticaron no Hórreo que se siga cuestionando as mulleres pola roupa que levan.
“As mulleres temos que ter a liberdade de pensar, actuar e vestir como queiramos. Ninguén pode discriminarnos ou criticarnos por ir como queiramos ir, porque ese é o cerne da violencia de xénero”, subliñou a deputada do PPdeG, Paula Prado.
O presidente provincial, José Tomé, fixera unhas declaracións acerca da roupa de Candia durante un acto de protesta do PP en San Marcos. Fixera mención ao seu “aspecto de leopardo” e mesmo a comparara co “vaqueiro americano que entrou no Capitolio dos Estados Unidos”. Tomé pediu desculpas este sábado por tales comentarios.
APOIO DO BNG
No pleno, tamén a líder do BNG, Ana Pontón, quixo trasladar a Elena Candia todo o apoio dos nacionalistas. “Parécenos inadmisible que, en pleno 2021, unha muller teña que ser atacada por como viste. Parécenos inadmisible veña de onde veña”, subliñou.
Tras a intervención de Pontón e na súa quenda de palabra, a socialista Noa Díaz expresou os seus “respectos” a Candia e asegurou que espera que “acepte as desculpas” que, conforme indicou, xa foron “trasladadas onte”.
Paula Prado agradeceu estas palabras, pero tachounas de “xesto tímido” e aproveitou para criticar que o líder do PSdeG, Gonzalo Caballero, reducise as declaracións de Tomé a “un comentario pouco afortunado”.
ÁLVARO SANTOS SÚMASE ÁS CRÍTICAS
Quen tampouco se mantivo alleo á polémica foi Álvaro Santos, un dos socialistas que protagonizara tensións no pasado con José Tomé. A través do seu perfil en Facebook, o exsecretario do PSdeG en Lugo cualificou de “intolerables” as palabras de Tomé e asegurou que a el non o representa nin “como lucense nin como militante do PSOE”.
