EFE | O Colexio Oficial de Veterinarios de Lugo denunciou o que considera unha “falta de concreción nos prazos de vacinación” fronte ao covid-19 no relativo a estes profesionais, uns 1.100 en toda a provincia.

O presidente deste colectivo, José Luis Benedito Castellote, considera “inxustificable” que, ás portas do mes de abril, “aínda non se estableceu un calendario para quen estivo desde o inicio en primeira liña” da loita contra o coronavirus.

Así mesmo, lembrou que o Colexio remitiu en 48 horas a relación de profesionais que desexaban ser vacinados, “sen que desde o 10 de marzo” se volvese ” ter noticias sobre esta cuestión”.

“Aínda que sabemos que existen outros colectivos profesionais e outros grupos de poboación que deben ser tamén prioritarios, ninguén pode cuestionar a relevancia dos veterinarios para o control da pandemia”, explica o presidente do Colexio.

“Desde o primeiro momento, como tantos outros traballadores do ámbito sanitario, estivemos en primeira liña de loita” contra a pandemia, “cada un desde as nosas posicións e desde as distintas especialidades que conforman a profesión, para asegurar a saúde e o benestar animal e, por suposto, a saúde humana”, engadiu.

“INAPRAZABLE”

Ante esta situación, o máximo representante dos veterinarios lucenses apela á “sensibilidade e á responsabilidade” da Xunta de Galicia para que, “na antesala dun mes en que se supón que se vai a incrementar notablemente a chegada de vacinas”, se lles dea “a estes profesionais a mesma prioridade” que a profesión lle deu a “apoiar, no posible, a contención dos contaxios”. Por tanto, considera “inaprazable” que se establezan “prazos claros e específicos, sen continuar demorando no tempo esta acción”.

Por outra banda, o colectivo ponse ao dispor da Xunta de Galicia para colaborar no proceso de inmunización, “na súa calidade de expertos”, dado que os veterinarios vacinan “cada ano a máis de 100 millóns de animais en España fronte a distintas enfermidades”.