Os cribados realizados polo Sergas nos últimos días en Vilalba e Palas de Rei deixan sete positivos tras 610 e 320 probas, respectivamente.

Segundo datos do Sergas, en Vilalba efectuáronse 550 PCR con cinco resultados positivos e 60 test de antíxenos, nos que se detectou 1 contaxio. A situación de “colapso dos servizos sanitarios” da provincia impediu que se puideran facer máis probas diagnósticas neste municipio, que tivo que parar de recoller solicitudes de participación o mércores 27.

O concello de Vilalba presenta unha incidencia de 182 casos de coronavirus confirmados nos últimos 14 días.

PALAS DE REI

Pola súa parte, o Sergas tamén realizou un cribado poboacional en Palas de Rei debido á elevada incidencia do municipio, unha das máis altas en relación ao número de habitantes. Nas últimas dúas semanas diagnosticáronse 72 casos.

Estaban convocadas 469 persoas de entre 18 e 65 anos, das que finalmente acudiron 320 a someterse ás probas. Os resultados só destaparon un caso positivo en coronavirus.