A área de Medio Ambiente do Concello de Lugo vén de informar de que dende primeira hora desta tarde quedan pechados todos os parques infantís da cidade ante a chegada dun fenómeno meteorolóxico adverso “de nivel laranxa”, con refachos de vento que chegarán aos 90 quilómetros por hora no centro e no sur da provincia.

A área que dirixe Álvaro Santos aclarou que operarios municipais precintarán os dous principais espazos verdes da cidade, tanto o parque de Frigsa como o de Rosalía de Castro, ademais dos demais parques infantís e xardíns da cidade, de modo que quedará prohibida a entrada aos mesmos desde ese momento.

Ademais, fai un chamamento á cidadanía para que “respecten esas limitacións” e eviten “correr risco innecesarios” que poderían “poñer en perigo a súa seguridade”.