Médicos de familia advirten que, na “situación actual” e ante “unha teórica vacinación masiva” da poboación a Atención Primaria “non estaría preparada” para esta campaña porque “non se reforzou” con máis persoal. Así o expresa o portavoz da Sociedade Española de Médicos Xerais e de Familia (SEMG), o doutor Lorenzo Armenteros, que exerce no centro de saúde Illas Canarias (Lugo).
“Seguimos na mesma situación que tivemos ao longo de toda a pandemia. Non se realizou ningún reforzo en canto ao persoal”, insiste. Lorenzo Armenteros celebra a “formación específica” que se está realizando nos centros de saúde de cara á administración das doses de Pfizer, que “teñen unhas condicións particulares de conservación”, pero reitera que a “falta de persoal” fai que a Primaria “non estaría preparada”.
Nunha xornada na que millóns de familias celebrarán reunidas a Noiteboa, o portavoz da Sociedade Española de Médicos Xerais e de Familia recomenda que as ceas e comidas destas datas se celebren en lugares que se poidan ventilar “cada certo tempo” para que o aire circule “dunha forma activa”.
