O Concello de Lugo e a Confederación Hidrográfica Miño-Sil sentaron este luns as bases para desbloquear o Plan Paradai, o que permite que se poida avanzar para a súa finalización 21 anos despois de que o Consistorio lucense e a Xunta asinasen o primeiro convenio co fin de unir os barrios de Paradai e As Gándaras.
Nunha rolda de prensa virtual, a alcaldesa de Lugo, Lara Méndez, e o presidente da confederación, José Antonio Quiroga, acordaron investir 650.000 euros nunha actuación que reducirá o risco de inundación do Río Rato ao seu paso pola rotonda que une Serra de Meira co viario da ponte de Paradai.
Segundo manifestou a rexedora lucense, “é necesario dar pasos para impulsar o desenvolvemento urbanístico” e promover así, segundo manifestou, “o Plan Paradai” porque Lugo “non se pode permitir non evolucionar cara a unha cidade verde, sustentable e ben comunicada“.
O desbloqueo deste luns, co convenio asinado “é unha gran noticia a pesar de que ten un sabor agridoce”, abundou, xa que o Plan Paradai iniciouse hai 21 anos, como comentou a alcaldesa lucense.
