O número de casos activos por coronavirus na provincia de Lugo é de 563 persoas, tres menos ca as rexistradas o pasado mércores. Esta nova baixada na cifra de positivos coincide tamén cun descenso no número de persoas ingresadas, tanto en Unidades de Coidados Intensivos como hospitalizadas en planta.
Segundo datos da Consellería de Sanidade, hai 13 pacientes nas UCI da provincia (dous menos ca onte) e 52 en hospitalización (-3). Por outro lado, só se rexistraron dous novos doentes en atención a domicilio, para un total de 498.
As altas tamén continúan a un ritmo favorable, ao sumarse 9 nas últimas horas. Así, xa se contabilizan 81 pacientes recuperados. Pola súa parte, o número de falecementos mantense en 17 despois de que na tarde de onte se soubera do pasamento dun varón de 92 anos que permanecía ingresado na UCI.
