EFE.- O Concello de Vilalba tomou a decisión cortar a rúa da Roxeira, en pleno centro histórico da localidade, como consecuencia do “mal estado dunha edificación“, que “presenta grave risco de desprendementos” que “poden ocasionar danos a persoas e vehículos”.

Segundo informou o goberno local, o tráfico quedará cortado a partir do día 5 de agosto, pero antes diso xa se procederá á sinalización do edificio, que está “en estado ruinoso”. Así, poñerase sobre aviso a condutores e viandantes con certa marxe de tempo. O concelleiro de Espazos Cidadáns, Rodrigo Pavón, precisou que se trata dunha medida “provisional, para garantir a seguridade, avisando con antelación e indicando o lugar afectado, ao ser declarado ese inmoble en ruína”.

Esta situación tamén obrigará a cambiar o sentido da circulación na Rúa Alférez Provisional, para que actúe como vía de saída da Praza Coronel Pena. “Procederemos a acometer as actuacións necesarias para asegurar a edificación, de non facelo os propietarios, repercutindo os gastos ocasionados aos mesmos”, aclarou. EFE