O Concello de Lugo redistribuíu a máis de cen nadadores do club Fluvial á piscina de Frigsa ante a inundación da súa piscina cuberta, causada pola crecida do río Miño por mor das últimas precipitacións. Segundo o comunicado, un dos vasos da infraestrutura habilitada será de uso exclusivo para os distintos clubs acuático-deportivos lucenses: o Porta Miñá de natación, o Waterpolo Lugo e o propio Fluvial.
O concelleiro de Deportes, Jorge Bustos, ademais de informar que os nadadores redistribuídos van desde a categoría promesas á absoluta, destacou que a actuación “non afectará as persoas que empregan a piscina de Frigsa para o baño libre“. “Logramos esta redistribución para garantir os adestramentos nunhas condicións que poden non ser as ideais, pero cumprindo unhas condicións aceptables e reforzando os servizos de limpeza en Frigsa”, agregou.
Con todo, o comunicado do órgano municipal enxalzou o labor realizado co obxectivo de que os nadadores do Fluvial poidan adestrar de cara ao Campionato Galego Infantil deste fin de semana e ao vindeiro Campionato Autonómico Júnior e Absoluto.
