O presidente da Asociación en Defensa das Costas do Parque Rosalía de Castro, Marcos Bourio, anunciou que pedirá ao goberno bipartito da cidade de Lugo, de PSOE e BNG, que derrube de forma “inmediata” as torres do Garañón.
Estes edificios atópanse a medio construír e paralizados pola xustiza, ao ser obxecto dunha investigación pola xuíza do número un de Lugo, Pilar de Lara, na que mantén investigados, entre outros, o ex-alcalde, Xosé López Orozco, e o que foi secretario xeral do PSdeG e ex-concelleiro de urbanismo na cidade, José Ramón Gómez Besteiro.
Bourio emprazou o novo goberno a que “se tomen medidas para retomar o expediente de reposición da legalidade, que está caducado”. Para iso, vai presentar un escrito en próximos días para “advertir desta situación e que dunha vez por todas se cumpran as sentenzas e se derrube O Garañón”.
O activista veciñal asegurou que “hai que esperar estes días para ver que intencións ten a corporación e, a partir de aí, continuar as accións no expediente de reposición da legalidade e derrubar o edificio”. “Non sei se a intención desta corporación é actuar de inmediato ou teremos que seguir insistindo nós, esperemos que non sexa así”, agregou.
Bourio sostén que “unha vez se autorice a súa demolición é fácil e non moi complexo”, pois “non se tardará máis de tres meses en desescombrar todo” neste lugar aos pés das costas do parque Rosalía de Castro.
