Os senadores do PP de Lugo defenderán este mércores no Senado unha iniciativa para reclamarlle ao Goberno que poña en marcha un plan de choque específico para “frear a sangría” de persoas autónomas na provincia de Lugo. Segundo trasladaron nunha nota de prensa, os datos correspondentes ao mes de agosto sitúan en 30.582 as persoas autónomas na provincia de Lugo, “un 0,61 % menos ca un ano antes”.
Para o PP, os datos mostran “un problema específico” que o Executivo central “non pode seguir ignorando nin atribuír unicamente á demografía, á estrutura produtiva ou ás competencias doutras administracións”. Como exemplo, os senadores lucenses mencionan as políticas de emprego da Xunta que, salientaron, “en 2026 mobiliza máis de 40 millóns de euros en programas específicos para autónomos e mantén un plan estratéxico de comercio dotado con máis de 320 millóns”.
