O Consello da Xunta autorizou a licitación do contrato de execución das obras de construción de 168 vivendas de promoción pública en Lugo, concretamente na parcela A de Garabolos.
Así o anunciou o presidente do Goberno galego, Alfonso Rueda, na comparecencia de prensa posterior á celebración do Consello, o primeiro tras o parón estival.
O importe de licitación do contrato será de 29.659.063,25 euros. A parcela onde se situarán as vivendas de promoción pública (VPP) ten unha superficie aproximada de 3.336,00 metros cadrados e a edificación proxectada ten unha superficie construída total de 25.443,44 metros cadrados.
O edificio proxectado consta de dúas plantas de soto destinadas a garaxes, trasteiros e locais de instalacións. O acceso a ambos os niveis prodúcese aproveitando o desnivel natural da parcela, de modo que o acceso ao soto -1 é desde a fachada este, mentres que a do soto -2 resólvese na fachada norte.
En planta baixa, concibida como un espazo de relación comunitaria cun soportal aberto á rúa, hai tres portais de acceso e locais de instalacións, cuartos de limpeza, espazos de reserva para residuos e outros auxiliares. Ademais, estarán os núcleos de escaleiras de acceso aos sotos.
As plantas altas están destinadas a vivendas, cunha planta tipo repetida entre as plantas primeira e sétima. Cada portal dá acceso a oito vivendas por planta, cun total de 24 vivendas por piso, ao redor dun corredor central que comunica o tres núcleos verticais. Do total de 168 vivendas, sete están adaptadas para persoas con mobilidade reducida.
