O BNG celebrará o vindeiro mércores en Lugo un acto público para presentar a candidatura de Rubén Arroxo á alcaldía nas eleccións municipais previstas para maio de 2027. A convocatoria terá lugar na Praza Maior, a partir das 20.00 horas, e contará coa participación da portavoz nacional da formación, Ana Pontón.
No acto tamén intervirán o propio candidato e o responsábel local de Galiza Nova, David Díaz. Coa cita, o Bloque busca abrir unha nova etapa de mobilización política na cidade de cara aos próximos comicios municipais, nos que aspira a facerse coa alcaldía lucense.
Arroxo chamou á veciñanza da cidade amurallada a sumarse á convocatoria para, segundo afirmou, “iniciar o camiño e devolver a Lugo o que leva anos elixindo: un goberno de progreso que, a partir de maio de 2027, estará liderado polo BNG”.
O LEMA “POLA DIGNIDADE DE LUGO”
A presentación da candidatura desenvolverase baixo o lema “Pola dignidade de Lugo”. Nun comunicado, o BNG sinalou que traballará durante o próximo ano co obxectivo de “facer historia e conseguir a alcaldía de Lugo”.
A formación nacionalista enmarca esta nova fase política no contexto aberto tras o que cualifica como “golpe de estado municipal protagonizado polo Partido Popular e apoiado por unha concelleira tránsfuga”, en referencia á mudanza no goberno local.
Arroxo tamén puxo en valor o papel desempeñado polo BNG durante os últimos sete anos no executivo municipal. Nese sentido, definiu esa etapa como sete anos “dun goberno de dignidade, de seriedade e de moito traballo”.
O candidato nacionalista defendeu, ademais, a xestión realizada polas áreas asumidas polo Bloque no Concello de Lugo. “O Partido Popular foi incapaz de poñer en cuestión un só proxecto impulsado polo BNG durante estes anos; iso demostra a capacidade de xestión e de transformación do Bloque cando ten responsabilidades de goberno”, subliñou.
