O Concello de Lugo acolleu este venres a sesión plenaria na que se aprobou o novo decreto de organización, que permitirá o aforro do 40% do gasto político respecto ao anterior bipartito de PSOE e BNG. Segundo avanzou a alcaldesa, Elena Candia, esta redución é posible ao descender o número de edís con soldo do consistorio. Ademais, confirmouse que a exedil socialista María Reigosa situarase na mesa presidencial, á dereita da rexedora.
En menos de dez minutos deuse por finalizado un pleno no que se deu luz verde ao novo organigrama, á normativa sobre as funcións de María Reigosa como asesora e á repartición económica para goberno e oposición. O expediente saíu adiante cos votos en contra de PSOE e BNG, que tamén rexeitaron a urxencia da convocatoria. O aforro exposto por Candia baséase en que agora só sete dos 12 edís do PP cobrarán do Concello, fronte aos 12 que percibían salarios na etapa anterior.
No grupo que non recibirá soldo municipal están Antonio Ameijide e Cristina Sanz, que xa cobran da Deputación e o Parlamento, respectivamente, ademais de Ramón Cabarcos, Silvia Colmenero e Aurora Goás, que continúan nos seus traballos privados. A alcaldesa percibirá 78.048 euros brutos ao ano e os concelleiros 56.356 euros. As axudas por asistencia a pleno aumentan de 100 a 250 euros para equipararse a outras cidades, dietas que só cobrarán os edís sen soldo fixo.
CRUZAMENTO DE ACUSACIÓNS
Antes do pleno, Elena Candia agradeceu o traballo dos funcionarios e acusou ao anterior goberno de marcharse “en estampida” e sen colaborar na organización de actividades como a programación das Letras Galegas. Pola súa banda, o BNG acusou ao executivo de non autorizar legalmente as festas da Piringalla, afirmando que as atraccións funcionaron antes da firma do decreto, extremo que o Goberno negou amosando o documento asinado o 14 de maio.
O exalcalde socialista Miguel Fernández foi moi crítico co proceso de convocatoria, cualificándoo de estar “repleto de trampas e atallos” co obxectivo de “amordazar á oposición”. Fernández cuestionou que varios edís do PP non deixen os seus empregos privados e considerou que a figura de supervisión de Reigosa responde unicamente a un “pago político” polo seu apoio na moción.
MESA NEGOCIACIÓN COLECTIVA
Unha vez terminado o pleno, Candia reuniuse coa xunta de persoal e anunciou que a vindeira semana se convocará a mesa de negociación colectiva. No encontro abordáronse cuestións como a carreira profesional, posibles modificacións da RPT en casos “indiscutibles” e a planificación de futuras ofertas públicas de emprego sectoriais.
A rexedora realizou unha valoración positiva deste segundo encontro cos representantes dos traballadores, destacando a súa vontade de manter un diálogo fluído. A alcaldesa completou a xornada coa súa asistencia á lectura do pregón das festas da Piringalla.
