A plataforma ‘Transfuguismo Non, Democracia Si’ convocou unha terceira concentración para protestar contra a moción de censura que se debaterá este xoves, 7 de maio, ás 12.00 horas, no Concello de Lugo. A protesta está prevista para as 11.00 horas, unha hora antes do inicio da sesión plenaria na que, se todo segue o seu curso, a moción sairá adiante co apoio da edil tránsfuga María Reigosa á candidata do Partido Popular, Elena Candia.
TERCEIRA PROTESTA CONTRA A MOCIÓN
Esta será a terceira mobilización convocada pola plataforma desde que se coñeceu a presentación da moción de censura. A primeira tivo lugar na mesma semana na que se fixo pública a iniciativa. A segunda celebrouse media hora antes do último pleno ordinario, o pasado xoves, unha sesión marcada pola tensión. O público accedeu á sala con pancartas, interpelou tanto a Candia como a Reigosa e o pleno acabou co desaloxo dos asistentes. Agora, a plataforma volve chamar á cidadanía a concentrarse ás portas do Concello para expresar o seu rexeitamento a unha moción que considera allea ao sentir maioritario da cidade.
UN CONTEXTO “ESCURO” E “FALTO DE ÉTICA”
O colectivo critica o contexto no que se produce a moción de censura, que cualifica de “escuro” e “falto de ética”. Sostén que a operación política non responde ao sentir maioritario da cidadanía e cuestiona as circunstancias que rodean o acordo entre o PP e María Reigosa. A plataforma considera que se están vulnerando principios básicos no ámbito institucional e lanza duras críticas contra a edil non adscrita e contra o Partido Popular. “Tiveron que morrer tres persoas para que Reigosa puidese escalar e apoiar a moción do PP, e isto faise previo pago dos favores coa creación de prazas de emprego da Xunta de dubidosa transparencia e ignorando o sentir da cidade”, sinala o colectivo. Tamén acusa o PP de “traizoar os seus estatutos”, que, segundo lembra, están en contra do transfuguismo, e faino coa “complicidade silenciosa” do “xefe de filas” de Elena Candia, ao que reprocha que “mire para outro lado”.
CHAMAMENTO Á PARTICIPACIÓN CIDADÁ
A plataforma insiste na súa oposición frontal á moción de censura e fai un chamamento á participación cidadá na concentración deste xoves. O colectivo defende que a protesta é unha mostra de rexeitamento á operación política e un exercicio democrático lexítimo fronte ao que consideran unha alteración da vontade expresada nas urnas. A mobilización chegará nun contexto de máxima tensión política en Lugo, tras os incidentes rexistrados no último pleno e a denuncia presentada por María Reigosa por insultos e lanzamento de moedas.
O BNG DEFENDE AS PROTESTAS
Neste contexto, o tenente de alcalde de Lugo, Rubén Arroxo, asegurou que nos “últimos días” á fronte do Goberno local están a tentar ser “leais á cidade” presentando os traballos que se estiveron desenvolvendo. O portavoz nacionalista volveu cualificar a moción de censura como unha acción “ilexítima” e contraria ao sentir popular. Tamén manifestou o seu temor a que moitos dos proxectos actualmente en marcha queden paralizados ou sen executar se prospera o cambio de goberno. “A inmensa maioría da poboación de Lugo está indignada e non quere isto”, afirmou Arroxo, que lembrou que na última concentración da plataforma, na que participaron preto dun milleiro de persoas, os asistentes “manifestáronse moi democraticamente”.
ARROXO RESTA IMPORTANCIA Á DENUNCIA DE REIGOSA
Sobre a denuncia presentada por María Reigosa por supostos insultos e agresión no pleno, Arroxo restoulle importancia, aínda que recoñeceu que houbo comportamentos reprobables. “Houbo algunhas persoas que se pasaron de freada e unha que fixo un insulto fóra de lugar, pero que mesmo foi repudiado polo resto de asistentes. Tamén houbo unha persoa que lle tirou moedas ao chan; son cousas que non están ben”, sinalou. A concentración deste xoves converterase así no preludio dunha das sesións máis tensas da política municipal galega recente, cunha moción de censura que pode cambiar o goberno de Lugo e abrir unha nova etapa marcada, desde o primeiro día, pola polémica arredor do transfuguismo.
