O secretario xeral do PSdeG, José Ramón Gómez Besteiro, asegurou que dentro dun ano Lugo volverá ter un goberno de “boas persoas, democrático e apoiado polos veciños”. “En política non todo vale”, subliñou. Así o trasladou tras ser preguntado nun acto sobre sanidade en Ourense pola multitudinaria manifestación deste pasado venres ante a casa consistorial de Lugo na que se expresou o rexeitamento ao “transfuguismo” e denunciouse o que consideran un “atropelo democrático” ante o inminente cambio de goberno.
Besteiro destacou que á manifestación chegaron miles de persoas de dentro e de fóra de Lugo “en defensa da democracia” e para dicir “alto e claro” ao Partido Popular que esa operación “indigna, inmoral” de moción de censura “non vai ter éxito”. Neste contexto, sinalou que tamén foi un día no que lembraron ao tres compañeiros socialistas falecidos no mandato: a alcaldesa Paula Alvarellos e os concelleiros Pablo Permuy e Olga López.
Tras 27 anos de goberno socialista en Lugo, o PP buscará recuperar a Alcaldía nun pleno extraordinario convocado para o próximo 7 de maio. De saír adiante a moción, a portavoz popular Elena Candia accederá ao bastón de mando.
