O PP de Lugo reclamou este venres ao Goberno central que “teña en conta” as alegacións presentadas pola Xunta de Galicia á planificación da rede de transporte de enerxía eléctrica para o horizonte 2030, así como un incremento do investimento en Galicia e unha distribución territorial “xusta e equilibrada”.
Os populares advertiron nunha nota de prensa de que a proposta actual do Executivo central “hipoteca” o desenvolvemento da provincia durante a próxima década e supón “un exemplo máis de discriminación” cara ao territorio lucense.
Nunha rolda de prensa celebrada no Senado, o senador José Manuel Barreiro denunciou que a provincia carece actualmente de subestacións de transporte na súa zona central e oeste. Segundo explicou, isto provoca que “boa parte da provincia” non poida conectar á rede eléctrica proxectos industriais de mediana ou gran empresa.
Así, Barreiro criticou que, a pesar de que Galicia é a zona con maior volume de produción enerxética, a comunidade só recibiría un 1,6% do investimento estatal destinada a novas actuacións, o que equivale a uns 215 millóns de euros. “Galicia produce máis, pero recibe menos investimento para novas infraestruturas eléctricas”, lamentou o senador, quen tachou de “cómplices” a PSOE e BNG.
