A secretaria de Organización do PSdeG, Lara Méndez, asegurou que a formación respecta o proceso xudicial aberto pola Fiscalía contra o expresidente da Deputación de Lugo e actual alcalde de Monforte, José Tomé, e dixo que o partido actuará “en función dos acontecementos”.
Así se pronunciou ao ser preguntado pola decisión do Ministerio público de querellarse contra Tomé tras recibir a denuncia por uns feitos que considera que “están suficientemente determinados” e posúen “indicios fundados de criminalidade”.
Lara Méndez subliñou que o Partido Socialista sempre apela ás vítimas a denunciar e dixo que se a Fiscalía actúa é porque hai denuncia. “Cando temos coñecemento, sempre animamos a que se produza esa denuncia e, por tanto, hai unha denuncia e a Fiscalía actua e agora temos que ser respectuosos tamén cos procesos xudiciais”, afirmou.
Ademais, interpelada tamén por se o PSOE deixará de apoialo no Concello de Monforte, onde Tomei –xa fóra das siglas socialistas– goberna como alcalde non adscrito pero co apoio do PSOE, Méndez dixo que a formación irá observando como se desenvolven os acontecementos e que actuará “con contundencia” en función diso.
Todo iso nunha intervención na que lembrou que o proceso aberto a nivel interno contra Tomé quedou suspendido unha vez que o asunto foi xudicializado. “Agora temos que ser, como sempre nun Estado de Dereito, respectuosos coa xustiza e tamén respectuosos coa presunción de inocencia e a oportunidade de que toda persoa poida tamén defenderse”, afirmou.
