Deputados do PP rexistraron unha pregunta ao Ministerio de Transportes e Mobilidade Sostible sobre a “falta de avances” nas obras de pasos a nivel comprometidos en Lugo. Nun comunicado, os populares lembraron que en 2024 ADIF iniciou o expediente para eliminar seis pasos a nivel que hai na cidade, “pero tras un ano de tramitación e máis de tres meses desde a adxudicación das obras, aínda non se iniciou ningunha actuación”.
Así, a deputada Cristina Abades lamentou que, a pesar da traxedia ocorrida no paso de Recimil, “todo segue igual”, sen que se iniciasen os traballos comprometidos. Cabe lembrar que dous mozos faleceron en xullo de 2023 no devandito paso a nivel tras ser arroiado o seu coche por un tren. Ante esta situación, o PP presentou unha batería de preguntas á mesa do Congreso para esixir un calendario “realista e rigoroso” destas obras.
“A seguridade non pode quedar supeditada a anuncios sen executar. Os lucenses merecen feitos e non promesas e merecen que os compromisos adquiridos se cumpran en tempo e forma”, reivindicou.
