O alcalde de Lugo, Miguel Fernández, reclamou un “maior compromiso” por parte da Xunta naqueles proxectos que sexan estratéxicos para a cidade, entre eles referiuse á finalización do corredor Nadela-Sarria e á reactivación do plan Paradai, así como ao futuro Museo da Romanización ou á recuperación do barrio da Tinería.
“A nosa man está tendida para colaborar co Goberno autonómico en todo o que sexa necesario para que Lugo avance, pero urxe que a Xunta axilice a materialización dos asuntos pendentes e concrete solucións para os proxectos estratéxicos que son da súa competencia e están a condicionar o desenvolvemento e benestar dos veciños”, sinalou o rexedor.
Neste sentido, destacou a necesidade de avanzar na conexión do polígono industrial das Gándaras coa A-6, así como en finalizar o corredor de Nadela a Sarria. Así mesmo, o goberno local afeou a “parálise” do plan Paradai, un proxecto no que, segundo lembrou nunha nota de prensa, “tanto o Concello de Lugo como a Confederación Hidrográfica Miño-Sil cumpriron cos seus compromisos asumidos”.
Neste contexto, o alcalde tamén fixo un chamamento á Xunta para que rehabilite o barrio da Tinería, “unha zona de gran valor patrimonial e artística que necesita unha intervención decidida para pór en valor o seu patrimonio histórico”. Con todo, Fernández tamén afeou a “falta de acción” respecto ao proxecto do Museo da Romanización, un proxecto que cualificou de “fundamental” para dar visibilidade a máis de 15.000 pezas arqueolóxicas descubertas na cidade amurallada durante as últimas décadas.
