A eurodeputada do BNG, Ana Miranda, remitiu este luns unha carta á vicepresidenta executiva da Comisión Europea para unha Transición limpa, xusta e competitiva, Teresa Ribera, na que solicita unha reunión cos colectivos que se opoñen á instalación da factoría que a multinacional lusa Altri quere instalar no municipio lucense de Palas de Rei.

“Desde o BNG seguimos traballando en contra do espolio do noso país e por iso pensamos que é imprescindible que a vicepresidenta Ribera coñeza de primeira man os argumentos contrarios á instalación de Altri“, subliñou Miranda.

Así, nunha nota de prensa, explicou que este proxecto “está a causar unha gran oposición na sociedade galega”, xa que, “aínda que inicialmente contemplábase a instalación dunha fábrica téxtil, finalmente trátase dunha macrocelulosa que pretende instalarse nunha zona agrogandeira rica en biodiversidade, Patrimonio da Humanidade da Unesco”.