O Partido Popular e o BNG apoiaron no pleno municipal que o Concello de Lugo reprobe ao ministro de Transportes, Óscar Puente, por asegurar que o tren “vive o mellor momento da historia” e para pedir o reforzo dos servizos ferroviarios, así como as actuacións necesarias para a chegada da alta velocidade á cidade.
Ao contar co apoio dos nacionalistas, que gobernan a coalición co PSOE nesta cidade, a iniciativa presentada polo Partido Popular foi aprobada.
Respecto diso, nun comunicado, a portavoz do PP de Lugo, Elena Candia, agradeceu o voto a favor dos nacionalistas para reprobar a un político ao que, segundo indicou, “Lugo nada lle debe”.
O PP de Lugo sostivo que “en tan só nove meses” a alcaldesa, a socialista Paula Alvarellos, “perde o respaldo dos seus socios de goberno nunha iniciativa”.
“O BNG votou a favor de reivindicar infraestruturas para a nosa cidade e a alcaldesa quedou soa e perdeu a votación escenificando a ruptura do seu pacto de goberno”, dixo.
OUTRA INICIATIVA APROBADA
Por outra banda, o pleno aprobou outra proposición, neste caso do BNG, para instar á Xunta a retirar a declaración de iniciativa empresarial prioritaria á planta de biometanización proxectada en Coeses, en Lugo.
Tal e como sinalou noutro comunicado, o portavoz do BNG de Lugo, Rubén Aroxo, explicou que esta declaración permite “reducir á metade” os trámites administrativos necesarios para a construción desta planta e censurou que se trata dun proxecto que “reconce que emitirá cheiros e gases contaminantes” á contorna.
