O concello lucense de Negueira de Muñiz, o máis pequeno de Galicia e o único que elixe os seus gobernantes a través de listas abertas, revalidou este 28M o apoio ao seu rexedor socialista, José Manuel Braña, no cargo desde hai dúas décadas.

Este municipio, no que se elixen cinco representantes municipais, é o único da comunidade no que se vota mediante listas abertas. De tipoloxía similar á que se utiliza para elixir representantes no Senado, a papeleta das municipais divide entre as candidaturas e, á beira de cada nome, aparece unha casa na que se pode pór unha cruz. Deste xeito, os veciños seleccionan ás persoas de cada candidatura ás que ofrecer o seu apoio.

A lei electoral recolle que, para concellos de entre 101 e 250 residentes –o censo que se tivo en conta para os comicios aínda situaba Negueira por baixo dos 250, aínda que, segundo o alcalde, a situación cambiou– cada formación poderá presentar unha lista como máximo de cinco nomees. Cada elector pode seleccionar catro candidatos.

Neste 28M, a lista socialista incluía cinco candidatos, mentres que a do PP estaba composta só por unha. No caso de Negueira Viva, inicialmente eran catro os integrantes da candidatura, pero Laura Lledín, quen ademais a encabezaba, tivo que renunciar por incompatibilidade, ao ser xuíza de paz substituta.

Finalmente, catro do cinco edís de Negueira de Muñiz serán socialistas –Ana Álvarez, Natalia Graña e Raquel Díaz– e José Manuel Braña repetirá como alcalde –sendo, ademais, o máis votado de todos os candidatos–. O quinto edil será Carlos Izquierdo, de Negueira Viva.

Esta opción electoral, en risco de desaparecer se o próximo censo supera os 250 habitantes, alcanzou, ademais, un gran apoio entre os veciños. Segundo os datos oficiais, incrementouse notablemente a participación, que pasou dun 90% en 2019 a un 98,34%. Non houbo abstencións e unicamente contabilizáronse tres votos nulos.