O PSdeG reclamará explicacións ao Goberno galego no próximo pleno do Parlamento polo “comportamento absolutamente inaceptable” do delegado da Xunta en Lugo, Javier Arias, ante a portavoz da Deputación, Pilar García Porto, a quen, segundo relatan os socialistas, no contexto dunha reunión convocada para analizar o convenio colectivo do Consorcio de Bombeiros Provincial, Arias “esixiu que se presentase nela o presidente da Deputación ao considerar que a participación da deputada non era suficiente”.
Para os socialistas, o representante autonómico en Lugo realizou afirmacións que, “máis aló de supor unha descualificación absolutamente inaceptable desde o máis elemental respecto persoal a unha representante lexítima de institución provincial, evidencian unha falta de respecto institucional que compromete á Xunta”.
Así, destacan que resulta “absolutamente inadmisible que Javier Arias pronunciase termos como “Dille a Pilar que mova o cu e veña para a reunión”, aseguran, unhas palabras que consideran “impropias en calquera relación” e “aínda máis entre institucións públicas”.
Por este motivo, os socialistas preguntarán no próximo pleno ao Goberno galego se considera necesaria algunha actuación ante o “comportamento absolutamente inaceptable do delegado territorial da Xunta en Lugo”.
