O presidente do PPdeG, Alfonso Rueda, acudiu este sábado á XXVI edición da Feira do Butelo do municipio lucense da Fonsagrada, desde onde pediu aos populares da localidade “coller forzas” para facerse coa Alcaldía.
“Vendo desde que cheguei o ánimo da xente, como quedamos a tan pouco da Alcaldía, esta vez hai que tentalo en serio. Hai que coller todas esas forzas de cando quedamos tan preto e darlle para adiante”, reivindicou o líder dos populares galegos.
Segundo trasladou o PPdeG, Rueda realizou un percorrido polo recinto feiral e mostrou o seu interese pola historia da Fonte Sacra, situada xunto á igrexa de Santa María. Un monumento que, ademais de dar nome ao municipio, “garda un gran número de lendas e tradicións vinculadas á Ruta Xacobea”.
Xunto a Alfonso Rueda estivo o presidente da xestora dos populares da localidade, Bernardo Neno, do que puxo en valor o seu labor como concelleiro e que ten “a experiencia” e “é coñecedor dos problemas que afectan o municipio e aos seus veciños”.
Pola súa banda, Bernardo Neno, trasladou a Rueda que el e o seu equipo fixan entre as súas prioridades “resolver o problema de despoboamento na Fonsagrada”, así como a “deterioración acusada das infraestruturas e dos servizos públicos”.