O alcalde de Castro de Rei, Francisco Balado, asume a viceportavocía do PP na Deputación de Lugo tras a vacante que deixaba á súa marcha Agustín Baamonde. Balado arrinca esta nova etapa coa esixencia ao goberno de José Tomé de que, “ao fío dos novos orzamentos, se incremente ata os 26 millóns de euros o Plan Único”.
Así, insiste en que só con este incremento cumprirase ” coa promesa que fixo ao comezo do curso político de aumentar o gasto no Plan Único nun 25%”. Destaca o novo viceportavoz popular provincial que “a Deputación recibirá máis fondos debido ao incremento na participación dos tributos do Estado. “Por iso queremos que cumpran ese compromiso que anunciaron de aumentar o gasto no Plan único ata os 26 millóns de euros”, agrega.
Lembra Francisco Balado que o executivo provincial ten que “pensar nos municipios e en que asumen gastos extraordinarios como consecuencia da subida da factura eléctrica e dos carburantes”.
Para o portavoz popular na Deputación, Javier Castiñeira, a incorporación ao equipo de Franciso Balado “será a voz non só de Castro de Rei, senón de todos os concellos pequenos e medianos que necesitan que os defendan con forza, porque en moitas ocasións son ninguneados pola Deputación en temas como estes”.
