O presidente da Deputación de Lugo, José Tomé Roca, chamou este xoves a traballar “firmemente” nun sistema educativo “ben financiado” durante a presentación do libro ‘O Ensino na Terra de Lemos nos séculos XIX e XX’, co que colabora o entre provincial.
Na obra, o autor, Pedro Gómez, fai un repaso pola historia do sistema educativo do sur da provincia lucense. Segundo destacou Tomé, Gómez “coñece desde todos os puntos de vista posibles a evolución e a realidade do sistema educativo, como profesor, inspector de Educación ou como responsable de cargos autonómicos relacionados coa organización educativa”.
“Por iso, nas páxinas deste libro asómase a gran historia do noso sistema educativo, pero tamén as pequenas historias persoais de profesores, mecenas, reformadores educativos e alumnos”, indicou o presidente. Para el, este libro ten que servir para reflexionar de novo sobre a necesidade de apostar firmemente polo ensino “público, universal e de calidade”, así como pola necesidade de investir no ámbito educativo.
Por outra banda, a Deputación de Lugo é estes días a entidade anfitrioa do III Seminario de Intercambio de Experiencias Turísticas, un encontro promovido polo Eixo Atlántico que se celebra este xoves e venres para favorecer o impulso deste sector en Galicia e no norte de Portugal.
