A presidenta do PP de Lugo e parlamentaria autonómica, Elena Candia, asegurou este luns que está “moi sorprendida” de que a Deputación de Lugo reclamase á Xunta que financie os seus centros de maiores e as inclúa na rede pública autonómica de residencias.
“Calquera valoración que se poida facer das residencias ten que ser de recoñecemento ao traballo dos seus profesionais en que nun momento complicado dérono todo para atender aos nosos maiores. E sorprende moitísimo que na Deputación, que levan presumindo do seu modelo de residencia, confrontándoo co da Xunta como algo innovador e distinto, e agora que pretendan que se faga cargo dese modelo e queiran renunciar dese modelo do que levan presumindo moito tempo”, esgrimiu.
“Dicir que a Xunta non colabora economicamente é faltar á verdade, porque a Xunta a través das libranzas vinculadas está a axudar no financiamento económico dese servizo”, engadiu.
A líder dos populares de Lugo asegura que esta “reclamación”, ademais “de ser unha manobra rara e difícil de explicar”, faille pensar que “algo non casa”.
A proposta da Deputación que parte do grupo socialista, que goberna en coalición co BNG, cínguese a “abrir un proceso de negociación” co Goberno galego para que asuma a xestión económica e loxística dos centros de atención provinciais.
