O PSdeG pedirá na Cámara galega que a Xunta elabore un plan para garantir que se manteñan os empregos nas empresas afectadas polo incendio do polígono do Ceao.
Así o destacou este venres o secretario xeral do PSdeG, Gonzalo Caballero, nunha visita á zona, onde lembrou que a Xunta ten as competencias en materia industrial.
Na súa intervención e acompañado pola alcaldesa, Lara Méndez, Gonzalo Caballero tendeulle a man ao presidente da Xunta, Alberto Núñez Feijóo, e ao conselleiro de Industria, Francisco Conde, para que todas as iniciativas que se poidan levar a cabo para dar futuro ás empresas afectadas conten co “apoio” do PSdeG.
O socialista, ademais, destacou a “total involucración” do goberno municipal de Lugo e da Deputación provincial cos afectados por este incendio sobre o que, segundo indicou, os investigadores “aínda necesitan tempo” para aclarar a orixe.
AGRADECEMENTO AOS SERVIZOS DE EMERXENCIA
Gonzalo Caballero aproveitou a súa visita a Lugo para trasladar o agradecemento dos socialistas galegos aos bombeiros, policías e demais persoal de emerxencias que desde o domingo estivo pendente dun lume que “puxo en risco o polígono do Ceao”.
“Son heroes que defenden as nosas propiedades, as nosas vidas en momentos de enorme dificultade e hoxe queremos comezar esta visita recoñecendo o traballo que fan e póndoo en valor”, indicou.
Ademais, agradeceu á alcaldesa de Lugo a súa “dedicación” e o estar “en primeira liña” coordinando a xestión para evitar que o incendio “fose a maiores”. “O polígono industrial do Ceao é un pulmón industrial para Lugo e para toda a provincia”, subliñou Caballero.
EVOLUCIÓN DO INCENDIO
Pola súa banda, a rexedora agradeceu a preocupación mostrada polo secretario xeral do PSdeG desde a xornada do domingo, na que se iniciaron as chamas.
Ademais, dixo que, nestes momentos, os efectivos de emerxencia traballan en humedecer a zona tendo en conta que o lume está controlado pero “non apagado”. “Queremos apagalo para minimizar todos os perigos que poida haber”, apuntou.
Tamén deu conta de que na tarde deste venres empezaron os labores de derriba dalgunhas naves, tras o que os propietarios terán que analizar que queren facer de cara ao futuro. Así, comentou que algún propietario pensa en aproveitar para ampliar a zona de produción e almacén da súa empresa e trasladar a outro punto o punto de venda.
Dito isto, incidiu en que é o momento de tentar desde as administracións “ser áxiles” e pór todos os mecanismos a disposición dos afectados para tratar de colaborar con eles “o máximo posible e tentar recuperar a normalidade”.
