O socialista Álvaro Santos, actualmente concelleiro no goberno local de Lugo, compartiu nas súas redes sociais unhas palabras que traen de volta ao presente as tensións mantidas con José Tomé, presidente da Deputación, e Gonzalo Caballero, líder do PSdeG. Santos criticou o comentario “intolerable” de Tomé en alusión á vestimenta de Candia e asegurou que a el non o representa nin “como lucense nin como militante do PSOE”.
O que foi secretario do PSdeG na provincia de Lugo, e que tivo un enfrontamento público con Gonzalo Caballero, acusa o xefe de filas socialistas de dicir “que non pasaba nada” e recalca que o comentario de Tomé “non é desafortunado”, senón “soez, irrespectuoso e inaceptable de quen representa unha institución en nome dunha organización política abandeirada da igualdade, respecto e dignificación da muller”.
“Supoño que entre imposicións de disciplinas e intereses calará e xustificarase, pero nin iso nin unhas mediocres e hipócritas desculpas corrixen este acto de desprestixio institucional e misóxino”, apunta.
