O presidente da Deputación de Lugo, o socialista José Tomé, esixiu este xoves á Xunta que achegue máis recursos para os sectores afectados polas restricións derivadas da pandemia da covid-19, como son a hostalaría ou o comercio. “Nós non somos os que abrimos ou pechamos os negocios”, esgrimiu, antes de lembrar “o dito de que ‘o que rompe, paga'”.

Ao tempo e na mesma xornada na que presentou un plan de impulso económico para a provincia, queixouse de que, despois dun ano, as administracións locais non recibiron “nin un só euro extra” para combater o impacto da crise sanitaria, a pesar de que as necesidades creceron.

Na súa intervención, Tomé subliñou que o papel das deputacións é “colaborar” cos concellos e co tecido produtivo, con “actuacións de impulso, de promoción e de recuperación da economía”, á vez que subliñou que “as axudas directas aos sectores económicos afectados, segundo a lei e os recursos, corresponde aos gobernos autonómicos”, á Xunta no caso galego.

“Ten o deber de facelo por tres razoes claras: ten as competencias, segundo o Estatuto de Autonomía; ten os recursos económicos, pois conta este ano cuns orzamentos de 11.563 millóns, xa ingresou 224 e recibirá 441 máis da UE expresamente destinados a establecer axudas a sectores afectados pola pandemia, e porque é a Xunta a que aproba as restricións“, esgrimiu.

DEMANDA TRANSPARENCIA

Á marxe de máis apoios, Tomé tamén demandou “transparencia” sobre o destino dos recursos extraordinarios que recibe porque “de momento non a hai”.

“A día de hoxe, non sabemos canto diñeiro gastou realmente. Parece lóxico que, se os concellos e deputacións non estamos a recibir nin un euro, que menos que saber cara onde se destinan eses recursos”, reflexionou.

Finalmente, cargou contra a Xunta por contar só “cando lle convén” con municipios e deputacións, como para “tapar” as críticas polo peche da hostalaría.