Senadores do PP esixiron ao Goberno central “políticas activas e transversais” contra o despoboamento do rural lucense a través de distintas iniciativas rexistradas na Comisión de Despoboamento e Reto Demográfico da Cámara Alta.
Segundo informou o PP de Lugo, as propostas presentadas polos representantes do partido na provincia diríxense a mellorar as infraestruturas de comunicación, garantir o acceso a Internet ou impulsar incentivos fiscais para discriminar positivamente o rural da provincia.
Entre outras cuestións, os populares buscan evitar o desmantelamento do ferrocarril e lograr o compromiso do Goberno para finalizar as obras nas autovías A-54, A-74 e A-56. Tamén piden loitar contra a fenda dixital, que o Executivo estatal estableza políticas que favorezan o emprego no rural na liña das medidas impulsadas pola Xunta, e que aplique outros incentivos como a rebaixa de impostos a autónomos de zonas rurais.
