O alcalde de Pol, o socialista Lino Rodríguez, enfróntase a unha proposta de sanción por incumprir o confinamento no marco do estado de alarma.
Así o confirmaron fontes consultadas con Europa Press. Mentres, fontes da Subdelegación do Goberno en Lugo, que terá que pronunciarse, asegurou que polo momento non recibiu a proposta.
O rexedor, consultado por Europa Press, rexeitou facer calquera tipo de declaración. Con todo, si trasladou á Cadena COPE, segundo recolle na súa páxina web, que foi interceptado por unha patrulla da Garda Civil cando regresaba de casa dunha veciña do municipio, onde supostamente se achegou para darlle unha medicación.
Segundo a versión do alcalde, recollida por Cope, Rodríguez explicoulles aos axentes o motivo do seu desprazamento e mesmo lles mostrou a súa acreditación como rexedor. Tal como conta, marchou do lugar sen ser consciente de que ía ser denunciado.
O PP PIDE A SÚA DIMISIÓN
Pola súa banda, o PP de Pol emitiu un comunicado no que pide a dimisión do rexedor por non respectar as restricións do estado de alarma. Os populares censuraron a actitude do rexedor, pois debería ser “o primeiro en dar exemplo ante os seus veciños”.
Neste sentido, ven “moi grave” esta forma de actuar e subliñan que as manifestacións coas que tentou xustificar “a súa saída” ante axentes da Garda Civil, “dicíndolles que era o alcalde, constitúen “unha irresponsabilidade persoal e política”.
Os populares consideran que o alcalde debería pedir “desculpas públicas” e instan ao PSdeG a “tomar cartas no asunto”.
