O secretario xeral do PSdeG, Gonzalo Caballero, asegurou que para que “Lugo progrese” necesítase un “goberno socialista forte en España” tras as eleccións xerais do próximo 10 de novembro. Así o defendeu durante a presentación este martes da candidatura socialista pola provincia para os próximos comicios estatais, un acto no que tamén participou a alcaldesa da cidade, Lara Méndez.
Neste escenario, o líder dos socialistas galegos puxo en valor os investimentos feitos polo goberno de Pedro Sánchez nesta provincia para “desfacer o mundo das mentiras no que vive o PP de Lugo”.
“Todos os grandes proxectos de Lugo están en marcha con Sánchez, mentres o PP de Lugo non fixo máis que entorpecer os avances desta provincia”, manifestou.
Así, entre outras cuestións, puxo en valor o impulso ás infraestruturas tanto na cidade como en toda a provincia, como o tramo Arzúa-Lavacolla da A-54 entre Lugo e Santiago ou o avance na Autovía da Mariña (A-74), que superou o trámite de información pública cunha licitación de 240 millóns.
“RISCO DE INVOLUCIÓN”
Ao fío disto, o xefe de filas do PSdeG advertiu de que o próximo 10 de novembro está en xogo o “modelo de país” e asegurou que, fronte aos socialistas, só está a “coalición das tres dereitas dirixida ideoloxicamente por Vox e Abascal”.
“Supoñen un risco de involución para o país e pon en cuestión o dereito ao aborto, a loita contra a violencia machista ou o dereito a unha morte digna e avances sociais importantísimos”, indicou.