A Deputación de Lugo inaugura este fin de semana a segunda edición do programa de turismo activo e de aventura ‘Actívate’ nos concellos de Ribas de Sil e A Pontenova con actividades vinculadas ao sendeirismo e á espeleoloxía.
A través desta iniciativa, a institución ofrecerá os fins de semana ata xullo un total de 26 actividades gratuítas para todos os públicos ao aire libre en máis dunha vintena de concellos da provincia.
Segundo informou a Deputación de Lugo, o programa ten como obxectivo “seguir apoiando ao sector turístico, a hostalaría e o comercio e, ao mesmo tempo, avanzar nun modelo de turismo de calidade e sustentable”, que pon en valor o “rico e diverso” patrimonio da zona e que “dinamiza” a economía e o emprego, sobre todo no rural.
A programación conta cun total de 450 prazas, entre 15 e 20 por actividade. As inscricións ábrense progresivamente todos os venres, cunha semana de antelación, ata completar o calendario. As persoas interesadas poden anotarse na web da Deputación. Algunhas disciplinas que ofrece son sendeirismo, surf, piragüismo, kaiak, vea, trekking, escalada ou equitación.
