EFE | O Concello de Lugo informou de que realizará dúas novas catas arqueolóxicas no barrio do Carme, por onde pasa o Camiño Primitivo a Santiago e a vía romana XIX, co fin de poñer en valor o patrimonio histórico e cultural desta zona da cidade.
Os traballos, que durarán uns catro meses, levaranse a cabo en parcelas situadas fronte á igrexa do Carme e a Sala de Exposicións Porta Miñá, moi preto da Muralla romana da cidade.
A alcaldesa da cidade, Lara Méndez, dixo que se busca “profundar no coñecemento arqueolóxico da zona, pola que pasan os principais roteiros históricos da cidade: a Vía XIX e o Camiño Primitivo”.
O Concello de Lugo informou de que esta será a terceira ocasión na que realizará unha intervención arqueolóxica neste espazo, despois de que o Servizo Municipal de Arqueoloxía actuase nos anos 1994 e 2005. “Esas intervencións revelaron no seu momento a existencia nesta zona dunha importante ocupación do espazo urbano durante os primeiros séculos de existencia na cidade, que durante a súa etapa baixoimperial puido acoller espazos de carácter funerario ou necrópole, vinculadas ao trazado da vía romana na súa saída da cidade”, dixo Méndez.
No ano 1994, o control arqueolóxico realizado na parte posterior da Sala de Exposicións Porta Miñá puxo ao descuberto un tramo da cloaca romana e, nestes momentos, o goberno local traballa nun proxecto para poñelo en valor. Ademais, unha cata situada á altura do Camiño Primitivo permitiu descubrir restos de muros relacionados coa cidade romano Altoimperial.
