A alcaldesa de Lugo, Elena Candia, e o concelleiro de Turismo e Museos, recibiu este mércores pasado no Concello o Cónsul Xeral de Portugal en Galicia, João Carlos Bezerra da Silva, nun encontro solicitado polo propio representante portugués no que abordaron as posibilidades de reforzar os vínculos entre Lugo e Portugal e avanzar en novas vías de colaboración.
Durante a reunión, a alcaldesa puxo en valor a relación histórica e de proximidade que une Lugo con Portugal e destacou o interese do Concello por dar un novo impulso a estes vínculos e traducilos en iniciativas concretas nos ámbitos do turismo, a cultura, a actividade empresarial, a mobilidade e a cooperación.
“Lugo e Portugal temos unha relación histórica, cultural e de proximidade moi forte. Agora queremos darlle un novo impulso e convertela tamén nunha relación máis operativa, con proxectos concretos nos ámbitos do turismo, a cultura, a actividade empresarial, a mobilidade e a cooperación”.
Un dos ámbitos abordados foi o turismo, analizando as posibilidades de incrementar a conexión con Portugal e promover accións de colaboración que permitan dar a coñecer Lugo como destino cultural e patrimonial.
A alcaldesa destacou tamén o irmandamento con Viana do Castelo, vixente desde 1990, como unha base sobre a que seguir fortalecendo os intercambios e buscando novas fórmulas de cooperación.
A reunión permitiu igualmente abordar as oportunidades existentes no ámbito da cooperación económica e empresarial, así como a importancia das conexións e da mobilidade para favorecer os intercambios entre Galicia e Portugal.
Tras o encontro no Concello o concelleiro de Cultura e Museos, Agustín Gallego, acompañou ao cónsul a unha visita ao Vello Cárcere, onde puido coñecer este espazo cultural.
