A Xunta sacou este venres a licitación por 29,6 millóns de euros as obras para construír 168 vivendas de promoción pública en Lugo, unha nova actuación que permitirá ampliar a oferta de vivenda protexida na cidade.
Os inmobles estarán destinados á compra e levantaranse nunha parcela situada na avenida Paulo Fabio Máximo, nunha zona xa urbanizada, con boas conexións viarias e próxima a un parque público e diferentes espazos verdes.
A conselleira de Vivenda e Planificación de Infraestruturas, María Martínez Allegue, presentou este venres os detalles da promoción, cuxa licitación xa está dispoñible na Plataforma de Contratos de Galicia. As empresas interesadas poderán presentar as súas ofertas ata o próximo 20 de outubro.
O proxecto contempla vivendas dun, dous, tres e catro dormitorios, todas elas dotadas de garaxe, trasteiro e terraza. Sete dos pisos estarán especificamente adaptados para persoas con mobilidade reducida. Ademais, o deseño priorizará a iluminación e ventilación natural, coas principais estancias orientadas ao exterior.
A promoción incorporará tamén diferentes solucións destinadas a mellorar a eficiencia enerxética dos edificios. Entre elas figuran sistemas de aerotermia, paneis fotovoltaicos e puntos de recarga para vehículos eléctricos.
Allegue destacou que se trata de vivendas concibidas con “todos os estándares de calidade” e que “son fogares que representan esa Galicia calidade da que estamos tan orgullosos”.
RESERVAS PARA MOZOS E FAMILIAS
Unha das principais novidades desta promoción será a distribución das vivendas en función de determinados perfís de acceso. O 30% dos pisos estará reservado a persoas de entre 36 e 45 anos que teñan fillos ao seu cargo, mentres que outro 25% destinarase a menores de 36 anos. En conxunto, máis da metade das vivendas estarán, por tanto, dirixidas prioritariamente a estes colectivos.
A conselleira vinculou esta medida á estratexia da Xunta para facilitar que un maior número de familias poidan acceder a unha vivenda pública. Dentro desta política tamén se ampliou o límite de ingresos esixido para optar a estes inmobles ata catro veces o Iprem, un limiar que se eleva a 4,5 veces no caso das familias numerosas.
Allegue puxo como exemplo que unha parella cun fillo que ata agora non podía superar os 2.250 euros brutos mensuais pasa a ter un límite de 3.530 euros. No caso das familias numerosas, o limiar aumenta de 2.571 a 4.154 euros mensuais.
A responsable autonómica defendeu así a “aposta inmensa” da Xunta pola vivenda, que, ademais da construción de novas promocións públicas, inclúe actuacións de rehabilitación e desenvolvemento de chan en colaboración cos concellos, así como novas medidas para ampliar o acceso a vivenda protexida.
615 VIVENDAS PÚBLICAS EN MARCHA EN LUGO
Con esta actuación, a Xunta continúa ampliando o seu parque de vivenda pública en Lugo. Nestes momentos mantén en marcha un total de 615 vivendas de promoción pública na cidade. Delas, 146 xa se atopan en obras e estarán destinadas ao aluguer.
Ás 168 vivendas cuxa construción acaba de saír a licitación súmanse, ademais, outras 152 situadas no mesmo barrio. Esta segunda promoción foi licitada por 26,5 millóns de euros e xa conta cunha proposta de adxudicación.
O conxunto destas actuacións supón “un novo impulso á construción de vivenda pública en Lugo”, recalcou a conselleira, con promocións destinadas tanto á compra como ao aluguer e con especial atención a mozas, familias e persoas con necesidades específicas de accesibilidade.
