O Concello de Lugo continúa coa programación de Tarde e Tardiña cunha das propostas máis singulares desta edición: o espectáculo Piensa en Wilbur, protagonizado polo acróbata, artista e televisivo Wilbur, que chegará este xoves, 27 de agosto, ás 18:00 horas, ao auditorio Fuxan os Ventos, en Magoi.
A actuación estaba inicialmente prevista ao aire libre, pero as previsións meteorolóxicas obrigan a trasladala ao interior do auditorio, mantendo tanto a data e o horario como o carácter libre e gratuíto da actividade.
Piensa en Wilbur é unha proposta na que se combinan acrobacia, humor físico e circo, pensada para sorprender e divertir a espectadores de todas as idades. As habilidades físicas do artista mestúranse cunha boa dose de humor e participación, facendo que tanto os máis pequenos como os adultos formen parte da diversión.
Wilbur é coñecido polo gran público polas súas aparicións en televisión e pola súa particular forma de combinar virtuosismo físico e comedia. A súa traxectoria como acróbata e intérprete levouno a participar en grandes producións e a actuar en diferentes escenarios e programas televisivos, consolidando un estilo propio no que as súas capacidades físicas se converten tamén nunha poderosa ferramenta cómica.
A programación de Tarde e Tardiña incorpora así unha proposta de gran atractivo para o público familiar, dentro dunha programación que aposta por actividades abertas e gratuítas e por achegar diferentes disciplinas culturais a distintos espazos da cidade.
O Concello anima ás familias lucenses e ás persoas que visitan Lugo a achegarse este xoves ao auditorio Fuxan os Ventos para desfrutar de Piensa en Wilbur ás 18:00 horas. A entrada será libre e gratuíta ata completar a capacidade do recinto.
CONCENTRACIÓN MOTOS
O Pazo de Feiras e Congresos de Lugo acollerá os días 29 e 30 de agosto a 2ª Concentración Motera Lugo Xabatos Bravíos, organizada pola asociación do mesmo nome, que espera reunir a un elevado número de participantes e vehículos chegados de distintos puntos de España.
O programa combina actividades de convivencia e lecer: sesión vermú, DJ, exhibición de stunt, sorteos e xogos, ademais dunha ruta nocturna de antorchas e unha ruta libre polas estradas do contorno, que pecharán cunha cea e festa final. O evento conta coa colaboración da Xunta de Galicia, do Concello de Lugo e de diversos comercios e empresas da cidade.
