O PP de Lugo denunciou que o Goberno de Sánchez quere suprimir o servizo de transporte estatal en autobús en 11 concellos lucenses, a metade dos afectados en Galicia, segundo o novo mapa concesional de autobús estatal.
Os senadores lucenses do PP, José Manuel Barreiro, José Manuel Balseiro e Juan Serrano-, realizaron unha pregunta na que interpelaron ao Goberno sobre se “prevé rectificar” a súa intención de suprimir as paradas na Pontenova, Meira, Guitiriz, Palas de Rei, O Corgo, Baralla, Monterroso, As Nogais, Pedrafita, Chantada e Quiroga.
Ademais, lembra que Grupo Popular logrou aprobar unha iniciativa no Senado –co voto en contra do PSOE e a abstención do BNG– na que instan o Executivo a elaborar un novo mapa que “corrixa esa discriminación aos pequenos concellos do rural”.
O PP de Lugo sinala que as liñas regulares de transporte de viaxeiros por autobús “son claves” para garantir e favorecer a mobilidade dos coidados, en especial dos que viven en zonas rurais e con menor densidade de poboación, e tamén para comunicar os territorios das distintas comunidades autónomas de España.
O PP destaca que o transporte interurbano de viaxeiros por estrada é un servizo de carácter público de competencia estatal prestado mediante un contrato de concesión. Por tanto, corresponde ao Goberno de España e, en particular, ao Ministerio de Transportes e Mobilidade Sustentable, deseñar a rede estatal.
Neste contexto, lembra que en xullo do 2022 tivo lugar o primeiro intento de “impor” un novo mapa de rutas do autobús estatal, algo que asegura que provocou “gran alarma” e alegacións tanto entre os gobernos autonómicos como entre a cidadanía, pola supresión de paradas e rutas.
“A pesar de que no seu momento retirouse esta proposta polo rexeitamento que provocou, hoxe sabemos que lonxe de rectificar, o Goberno de España, presidido por Pedro Sánchez, volve propor un novo mapa que retoma a indisimulada intención de suprimir paradas e rutas en termos similares aos do ano 2022″, censuran os senadores lucenses.
Só en Galicia, segundo sostén o PP, o mapa proposto polo Goberno suporía que 22 municipios galegos –máis de 130.000 habitantes– quedarían illados nas rutas estatais.
