CSIF advertiu ao Concello de Lugo que “emprenderá” as medidas de presión que considere oportunas se “continúa sen abonar” as cantidades debidas a efectivos da Policía Local por realizar servizos extraordinarios ante a falta de persoal en determinadas datas.
Segundo denunciou o sindicato nunha nota de prensa, o concello lucense “acumula” falta de pagamentos a estes traballadores desde o mes de xullo do ano 2023, aos que aseguraron que se suman “outras débedas pendentes” do 2022. Ademais do incremento do 2% correspondente ao exercicio 2024, que “tiña que abonarse con efectos retroactivos” desde o 1 de xaneiro e que tamén “está pendente de ingreso”.
Deste xeito, CSIF cualificou de “insustentable” esta situación e criticou que, aínda que “en xeral” afecta a todos os servizos, algúns cobraron, por exemplo, as horas extraordinarias do mes de novembro. Neste sentido, incidiu en que isto demostra un “caos total” no departamento de persoal.
“Son 14 meses de atrasos e non estamos dispostos a continuar sen cobrar, non podemos aguantar máis”, engadiu a Central Sindical, que tamén reivindicou o “esforzo” e a “responsabilidade” do persoal da Policía Local ao “asumir” esas horas extras para “garantir” a seguridade pública.
CSIF indicou que esta “falta de pagamentos” levan un “enriquecemento ilícito” da Administración que “non se pode tolerar”, polo que anunciou a convocatoria dunha asemblea para “estudar a situación” e “decidir as medidas de presión”.
