Un home, de nacionalidade romanesa, acusado presuntamente de abusar sexualmente da súa parella, á que tamén maltratou física e psicolóxicamente a través de insultos e ameazas, negou os feitos, no xuízo que arrincou este venres na Audiencia Provincial de Lugo.

“Nin falar mal, nin pegar, nin insultala, nin nada”, afirmou en declaracións á defensa, tras negarse a responder as preguntas da fiscalía e da acusación particular.

Sentado no banco dos acusados xunto a un “cómplice” requirido pola acusación particular que inclúe un delito a maiores, o de “explotación sexual”, que incorrería o outro procesado para o que pide 21 meses de prisión.

Por estes feitos, a Fiscalía solicita unha pena de 17 anos de prisión polos delitos de agresión sexual, malos tratos e ameazas, aos que a acusación particular suma seis máis por “indución á prostitución”.

Segundo a fiscalía, o acusado saía de prisión a finais de 2018, momento no que se puxo en contacto coa vítima, á que reclamaría baixo ameazas que se desprazase desde Valencia a Lugo para retomar a súa relación. Respecto destas acusacións, o procesado  declarou que foi ela a que veu desde a capital do Turia ata Lugo, e testemuñaba, a continuación, que con ela “nunca houbo ningún problema”.

Na mesma liña, a acusación pública mantén que a muller se presentou na cidade das murallas a finais de abril de 2019 e empezou a vivir co suposto agresor nunha casa abandonada. Durante as seguintes semanas, o home obrigou á vítima, tamén baixo ameazas, a ter relacións sexuais.

Xa o 15 de maio de 2019, despois de forzar á muller a mantener relacións, o acusado se personouse nas inmediacións do parque da Igrexa do Carmen, na cidade de Lugo, onde se atopaba a muller. Alí, empezou a propinarlle puñadas e patadas, e segundo a Fiscalía, dicíalle que “ou estaba con el ou con ninguén”, ademais de insultala.

O avogado da acusación particular, Xurxo Mato, antes de entrar na sala, remarcou que a súa defendida “está nunha situación sicolóxica moi delicada, porque lle afectaron moito os feitos”. Seguidamente puntualizou que “os feitos” narrados nas acusacións “son moi duros e xa non foi polo que pasou polas últimas semanas de relación, desde a saída de prisión, senón todo o que pasou nos últimos cinco anos de relación que foi uns malos tratos constantes, psicolóxicos e físicos“.

Tras pasar case tres anos dos feitos, o avogado relatou que á vítima “cústalle moito revivir o sucedido e menos mal que conta con axuda psicolóxica”. A defensa do principal procesado, María Montes, xa adiantaba que ía pedir a “libre absolución” ao “crer fiel e firmemente na inocencia” do seu cliente. “Entendemos que non existe proba de cargo”, deslizaba finalmente á vez que deixaba caer que era a “palabra dela contra a del”.

Ademais das penas de cárcere, a fiscalía solicita 25 mil euros de indemnización, que se elevan ata o 150 mil no caso da acusación particular.