EFE.- O avogado que defendeu o ex alcalde de Lugo, José López Orozco, en varias das causas instruídas pola xuíza Pilar de Lara, confía en que a substitución á fronte do Xulgado de Instrución Número 1 de Lugo sirva para que o novo maxistrado entre “no fondo dos asuntos”.
O letrado, Gregorio Arroyo, considera que nestes momentos hai unha “situación de interinidade” no xulgado de Lugo, despois de que Pilar de Lara fora apartada, en cumprimento da sanción imposta polo Consello Xeral do Poder Xudicial.
NOVO NOMEAMENTO “A FINS DE MARZO”
Aínda que o xuíz de apoio, que xa estaba a prestar servizo nese xulgado, se encargará do traballo ordinario, o avogado opina que, seguramente, ese maxistrado “non tocará aos casos de maior calado”.
“Haberá que esperar ao nomeamento dun novo xuíz titular para que entre no fondo dos asuntos”, dixo Arroyo. Segundo di, iso beneficiaría o seu cliente, xa que sostén que non existe ningún indicio que permita vincular a Orozco coa comisión dalgún delito.
En todo caso, estima que ese nomeamento non se producirá “ata finais de marzo”, como moi cedo.
