O grupo municipal do PP de Lugo denuncia que o Concello firmou un “novo récord” de pagos con reparos de legalidade durante o 2019, ao alcanzarse a cifra de 27.911.883’44 € en facturas que non seguirían os procedementos legais establecidos.
Ante estes datos, o voceiro do PP local, Ramón Carballo, tacha de “nefasta” a planificación económica do bigoberno, pois a terceira parte do orzamento municipal tería sido destinada a efectuar pagamentos con reparo de legalidade. Como motivo do problema, Carballo sinala directamente aqueles servizos municipais que se atopan con contrato caducado ou que carecen del. Por iso, pídelle ao PSOE e BNG que “devolvan á legalidade” esas prestacións.
Concretamente, os contratos que se atopan nunha situación de ilegalidade e que acumulan unha maior contía económica serían os seguintes: servizo de recollida de lixo (954.717’81€), EDAR (2.192.594,06€); ETAP (1.652.944,87€); mantemento da rede semafórica (1.786.069,58€), limpeza das dependencias municipais (1.649.042,83€) e mantemento das zonas verdes (1.233.537,80€).
A maiores, o voceiro popular cre que a situación se agrava ao engadir aos reparos de legalidade os recoñecementos extraxudiciais de crédito que o bigoberno leva mensualmente a cada pleno. “Falamos doutra situación que debería ser extraordinaria e que os socialistas converteron en habitual no concello”, lamentou.
