Debido á acumulación de ramallada e restos de árbores, a ponte sita entre as parroquias de Fonteita (O Corgo) e Tórdea (Castroverde) pode estar en risco. É a valoración que fixo a parlamentaria Olalla Rodil, do Bloque Nacionalista Galego, trala inspección visual realizada canda os voceiros locais da formación o pasado venres. Ao respecto do material acumulado nos arcos da ponte, o representante nacionalista no Corgo, Mario Outeiro, declarou que “pode crear un efecto encoro, a presión da auga podería danar seriamente a estrutura da ponte”.
A ponte situada entre as parroquias de Fonteita e Tórdea está preto da vía romana XIX que tamén sufriu importantes danos debido ás torrenciais chuvias. Ademais de servir de comunicación entre as dúas parroquias e facilitar o acceso ás fincas do entorno, a ponte afectada serve coma lugar de paso para numerosas persoas que practican o sendeirismo na zona. O BNG de Castroverde demandou recentemente o acondicionamento da Vía Romana que transita pola parroquia de Tórdea.
As chuvias torrenciais dos últimos días desfixeron completamente o tramo da Vía Romana que unía Braga e Astorga ao seu paso por Castroverde e tamén os camiños da zona. O arrastre dos materias areosos deixou intransitables os camiños e provocou a acumulación de materiais no percorrido do río Tórdea. É por iso que dende o Bloque reclaman a limpeza inmediata do leito para evitar danos irreversibles nunha ponte que xa sufriu desperfectos con anterioridade e tivo que ser reconstruída.
