O Centro Tecnolóxico Agroalimentario (Cetal) de Lugo, en colaboración con Abanca, pon en marcha este martes a realización dun ciclo de ‘Xornadas Agroalimentarias’ nas que se realizarán demostracións prácticas en condicións reais de actividades de transferencia tecnolóxica ao sector agroalimentario.
A primeira destas xornadas, titulada ‘Novas Tecnoloxías na Sementeira de Millo Forraxeiro’, terá lugar este martes nas instalacións da granxa Gayoso Castro que a Deputación de Lugo posúe na localidade de Castro de Ribeiras de Lea, en Castro de Rei.
A xornada dará comezo ás 11,30 horas coa exposición, de man de Dekalb España, “de temáticas innovadoras na sementeira de millo, como a adaptación da densidade de sementeira ao híbrido de millo e ao potencial produtivo do chan”, informou a organización.
Tamén se mostrará a forma de realizar as prescricións de sementeira para programar doses variables en función das distintas zonas da parcela. A asistencia á xornada é gratuíta e está aberta a agricultores, gandeiros, cooperativas, empresas de servizo, técnicos e resto de axentes interesados nas novas tecnoloxías dispoñibles no mercado para a sementeira do millo forraxeiro.
